بما إنه في كثير من مشاعر التثبيط وتخوين في الجو في اتجاه أبطال الثورة في مصر ..فـأنا هاحاول أرد على كل النقط المثارة وياريت نفكر بالعقل شوية :

1. مبارك لازم يستمر لسبتمبر علشان استقرار البلد والإقتصاد ميروحش في داهية!!

بالعكس ده مبارك لازم يغور في داهية علشان الاقتصاد ميروحش في داهية .. مبارك لو استمر لسبتمبر فـده ببساطة هايشل الاقتصاد المصري تماما .. لان مفيش حد عارف إيه اللي هيحصل في سبتمبر وبالتالي كل رؤوس الأموال هتطلع بره مصر لان مفيش حد هيحط فلوسه في المجهول .. مبارك لازم يمشي دلوقتي علشان نبدأ نبني في اقتصاد صح من دلوقتي

2. مبارك استجاب لمطالب الشعب وهينظر في طعون الانتخابات وهيعدل مواد الترشيح للرئاسة ! يعني خلاص خد نفسك وروح وكفاية وقف حال بقى!!

مبارك كل اللي عمله إنه بيستهبلنا!! أولا هو مقالش هيتعدل إزاي بالضبط .. أهو كلام في الهوا .. وماتكلمش عن إشراف القضاء على الانتخابات وتعديل المادة الخاصة بالموضوع ده .. كلنا شفنا انتخابات من غير قضاء بتبقى عاملة ازاي .. ماتكلمش عن رفع حالة الطوارئ أو عن المادة (179) في الدستور اللي هي قانون مكافحة الإرهاب واللي بتخلي حالة الطوارئ جزء من الدستور مش مجرد قانون طارئ .. ببساطة الراجل بيسكتنا وخلاص .. يعني هو عاوز يعمل إيه؟ هيعيدلك الانتخابات في 20 أو 30 دائرة ويديهم ل احزاب ملهاش لازمة وكل سنة وإنت طيب

3. مبارك اقال حبيب العادلي واتمنع من السفر ونفس الكلام لعز!! يعني الراجل عاوز يصلح فعلا!! عاوزين إيه تاني؟؟

برده استخفاف بعقلنا .. يعني هو بيطلعلنا كام كبش فده يخلص بيهم الموضوع والسلام .. لو إنت سمعت كلام الدكتور محمد صبرة على الجزيرة اللي هو مدير مكتب مبارك السابق قال إن مبارك كان بيشرف بنفسه على تزوير الانتخابات .. حُط فوق كده هو لو عاوز يحسب الناس فعلا مكان جامد أرصدة جمال وعلاء ماهم كسبوا ملايين على قفا الشعب .. ولا هو لسة معتقد إنه امبراطور وإن البلد دي ملكه

4. مبارك عين عمر سليمان نائب الرئيس وده راجل ماعليهوش كلمة !!

كله كدب .. عمر سليمان ده كان مخلي مصر محطة تعذيب دولية ل (CIA) يعني ببساطة الراجل ده نسخة انترناشيونال من حبيب العادلي وياعيني بقى على قوات الشرطة اللي هتعيش تعذيب ورا الشمس

5. طب يا جماعة نستنتى لسبتمبر بدل مانخرب البلد!!

إننا نستنى لسبتمبر هو اللي هيخرب البلد .. كل الحرمية بفلوس الشعب على لندن .. وبرده يكون الحزب الواطي عارف إزّي هيظبط الانتخابات في سبتمبر .. أهو يكون وصل لتسوية مع امريكا أو غيره

آخر حاجة .. هل إنت مستعد تصدق واحد بيكذب عليك 30 سنة؟ ومعتقد إنه هيتغير في كام يوم وهيسيب السلطة بالسهوله دي فعلا في سبتمبر؟

يعني كان الراجل قال حاجة في مئات الشهداء والجرحى الشباب أو كان على الاقل اعتذر .. ولا الهوا

الجزء التاني:

1. مبارك لو استقال! مش هينفع نعدل الدستور بسبب المادة 82 و 84 اللي بتنص على عدم تغير نائب الرئيس لأي حاجة؟

مش صح لانه مبارك لو استقال فـده شرعية للثورة وبنص المادة 3 من الدستور:

وده معناه إنه هتكون فترة انتقالية لوضع دستور جديد وبعدها يتم انتخاب الرئيس البرلمان اللذي يريده الشعب .. يعني مفيش أي سلطة للبرلمان الحالي أو نائب الرئيس أو أي حاجة .. دي مش حالة إن الرئيس تعب وقرر يستقيل أو مات أو أي حاجة دي بالظبط زي ثورة 52 حيث يتم تغير نظام السلطة وما الى هنالك .. لان السيادة للشعب بنص الدستور

2. طب مين اللي هيمسك الفترة الانتقالية؟؟ أنا مش عاجبني البرادعي!! هاتلي واحد يتفق عليه الناس؟!

لازم نفهم إن الفترة الانتقالية دي هي فترة وضع دستور جديد للبلاد من خلال لجنة حكماء ويعرض الدستور ل استفتاء الشعب ثم يتم التجهيز للانتخابات الرئاسية والبرلمانية وفي الوقت ده حقك تختار البرادعي أو حتى أم محمد .. حقك

يعني إيه؟ يعني دي مش فترة وضع سياسات للبلد دي مجرد فترة تجهيز علشان كل واحد فينا يختار اللي هو عاوزه فـمش مهم إني أكون موافق على سياسات اللي هيمسك المرحلة الانتقالية قد ماهو مهم إنه يكون راجل ذمته نضيفة وعنده خبرة كافية لانه هو مش هيحط أي سياسات للبلد بل مجرد إدارة عملية وضع الدستور الجديد ..

فإذا كنت شايف إن البرادعي أو غيره ذمته نضيفة وعنده خبرة إدارة مرحلة زي ده فده كفاية وبعدين في الانتخابات اختار اللي إنت عاوزه

3. الاخوان هيمسكوا البلد ويجيبوا إيران وده مخطط اسرائيلي امريكي لتدمير البلد؟

أولا: دي ثورة شباب مصر ومينفعشي ابدا نضيع جهدهم ببساطة كده .. دي ثورة شباب مصر الابطال مش الاخوان أو غيرهم

ثانيا: دول 3 حاجات ضد بعد .. الاخوان وإيران وإسرائيل فمينفعشي نخليهم يلعبوا بعقلنا بالسذاجة دي!! ورغم إن موضوع الاخوان محتاج شرح طويل بسبب عوامل كتيره في الوعي المصري لكن هاختصر .. خلينا نقول: أنا مختلف مع فكر الاخوان وشايف انهم منغلقين فكريا لكن الأكيد إن الاخوان مش حرمية ولا أصحاب أجندة خارجية والا كان اتحكم عليهم في قضية جنائية واحدة في عصر مبارك بالرغم من إن جهاز أمن الدولة مراقبهم ليل نهار .. الحل الواحد اللي كان امام النظام حتى يعتقلهم بحكم محكمة إنه كان يعرضهم على قضاء عسكري أو استثنائي .. ورغم إن كثير منهم تم اعتقاله لسنوات دون أي تهمة أو حتى عرض على قاضي الا إن الجماعة لم تنجر للعنف!! يعني إيه؟ يعني بلاش هبل في الجبل ومينفعشي يكون عندنا ورم سرطاني مستفحل ونقول أصل عنده برد .. الاكيد إن الاخوان سواء كنا مختلفين معاهم أو لأ فـهما فصيل مصري وطني مش تابع ل اجنده خارجية أو بتاع .. وبلاش يفضلوا حاكمينا بالخوف .. إذا خلينا بلدنا بلد محترمة وفيها حرية فده أكيد هينعكس على فكر الاخوان ويخليهم أكتر انفتاحا .. وفي ال آخر كل واحد فينا هيدي صوته للشايف إنه صح

…

ده اللي أنا شفت الناس بتكلم فيه .. شباب مصر محتاج دعمنا وإذا كنت بتقرا دي وإنت في مصر فـاقفل الكمبيوتر وانزل ادعم شباب الثورة .. وإذا كان تمن الثورة إننا ناكل عيش حاف حتى يسقط نظام مبارك فـدي اقل حاجة نقدمها لمصر !!

الحرية والمجد لأبطال الثورة